पर्यटनाचे केंद्रबिंदू ठरलेल्या गुहागर समुद्रकिनाऱ्यावर खुलेआम अवैध वाळू उपसा करून वाहतूक करणाऱ्या वाहनावर तहसीलदारांनी कारवाई केली. मध्यरात्री वाहन पकडून तातडीने पंचनामा करून कारवाई केल्याने अवैध उपसा करणाऱ्या सर्वांचे धाबे दणाणले आहेत. गुहागर समुद्रकिनाऱ्यावर खुलेआम अवैध वाळू उपसा करून चढ्या दराने वाळू विक्री केली जात होती. समुद्रकिनाऱ्याचे रक्षण करणारेच कुंपणच शेत खातंय अशी अवस्था समुद्रकिनाऱ्याची झाली होती. अशा स्थितीत नगरपंचायतीच्या निवडणुकीचा लाभ घेत मोठ्या प्रमाणावर उपसा व वाहतूक सुरू होती. येथील सर्कल अधिकारी व तलाठी व तहसीलदार परीक्षित पाटील यांनी या अवैध व्यवसायाविरोधात कठोर घोरण अवलंबले. रात्री या अवैध व्यवसायावर तहसीलदारांनी लक्ष ठेवले होते. वाळू उपसा करून जवळच्या मागनि जात असताना अर्धा ब्रास वाळू वाहतूक करणारे वाहन रात्री साडेअकरा वाजता पकडले.
वाहन पकडताच काहींनी मध्यस्थी करण्याचा प्रयत्न केला; मात्र याला न जुमानता तहसीलदार पाटील यांनी थेट कारवाई केली आहे. याबाबत पावसकर यांना २५ हजार रुपये दंड भरण्याची नोटीस बजावली आहे. पकडलेल्या वाहनाचे कोणतेही कागदपत्र नाहीत तसेच वाहनावर आरटीओ विभागाच्या कारवाईबरोबर बंधपत्र करून प्रांताधिकारी कार्यालयात पुढील मोठ्या दंडासाठी प्रस्ताव केला जाणार आहे. अजूनही नोटीस बजावल्याप्रमाणे संबंधित अवैध वाहतूक करणाऱ्या व्यक्तीने कोणताही दंड भरलेला नाही. परिणामी, यावर कठोर कारवाई होण्याची शक्यता आहे.
तलाठी, सर्कलची भूमिका महत्त्वाची – गुहागर समुद्रकिनाऱ्यावर अवैध वाळू उपसा व व्यवसाय वाढला होता. किनाऱ्याचे मालक आम्हीच असेच काहींचे वागणे होते. आमचं कोणीही वाकड करू शकत नाही, अशा आविर्भावात असलेल्यांवर चांगली दहशत या कारवाईमुळे निर्माण होणार आहे. आता यावर स्थानिक सर्कल अधिकारी व तलाठी किती लक्ष ठेवतात, हे पाहावे लागणार आहे.
