विठ्ठल दर्शनासाठी पंढरीत येणाऱ्या लाखो वारकऱ्यांसाठी आणि भाविकांसाठी एक अत्यंत आनंदाची बातमी समोर आली आहे. गेल्या अनेक दिवसांपासून चर्चेत असलेल्या ‘पंढरपूर मंदिर कॉरिडॉर’ आणि शहराच्या सर्वांगीण विकास आराखड्याला मुख्यमंत्री देवेंद्र फडणवीस यांच्या नेतृत्वाखालील मंत्रिमंडळ शिखर समितीने अखेर अधिकृत मंजुरी दिली आहे. सुमारे ४००० कोटी रुपयांचा हा भव्य प्रकल्प पंढरपूरचे स्वरूप पूर्णपणे बदलून टाकणारा ठरणार आहे.
पुढील ५० वर्षांचा विचार करून नियोजन पंढरपुरात आषाढी आणि कार्तिकी वारीला येणाऱ्या भाविकांची संख्या दरवर्षी विक्रमी पातळी गाठत आहे. नुकत्याच झालेल्या आषाढी वारीला एआय (AI) तंत्रज्ञानानुसार तब्बल २८ लाख भाविकांनी हजेरी लावली होती. ही वाढती गर्दी आणि भाविकांची सुरक्षितता लक्षात घेऊन, पुढील ५० वर्षांच्या गरजांचा विचार करून हा आराखडा तयार करण्यात आला आहे.
काय आहे या आराखड्यात? १. मंदिर कॉरिडॉर: विठ्ठल मंदिर परिसरात वारकऱ्यांना सुलभ आणि रांगेत उभे न राहता सहज दर्शन घेता यावे, यासाठी खास ‘कॉरिडॉर’ विकसित केला जाणार आहे. यामुळे मंदिर परिसरातील गर्दीचे व्यवस्थापन करणे सोपे होईल. २. भूसंपादन प्रक्रिया: या प्रकल्पासाठी आवश्यक असणारी जमीन संपादित करण्याची प्रक्रिया १ ऑगस्टपर्यंत पूर्ण करण्याचे निर्देश देण्यात आले आहेत. ३. पायाभूत सुविधा: रस्ते रुंदीकरण, भाविकांसाठी भक्त निवास, स्वच्छ पिण्याचे पाणी आणि आधुनिक स्वच्छतागृहांची सोय या आराखड्यात अंतर्भूत आहे.
व्यापाऱ्यांचे हित जपणार सुरुवातीला या कॉरिडॉरला स्थानिक व्यापाऱ्यांकडून काही प्रमाणात विरोध झाला होता. मात्र, मुख्यमंत्री देवेंद्र फडणवीस यांनी व्यापाऱ्यांना आश्वस्त केले आहे की, या विकासामुळे पंढरपूरमधील पर्यटन आणि धार्मिक पर्यटनाला मोठी चालना मिळेल, ज्यामुळे स्थानिक व्यापाऱ्यांचा व्यवसाय भविष्यात दहापटीने वाढेल.
या महत्त्वाच्या बैठकीला उपमुख्यमंत्री सुनेत्रा पवार, पालकमंत्री जयकुमार गोरे, आमदार समाधान आवताडे आणि विविध विभागांचे सचिव उपस्थित होते. या मंजुरीमुळे आता प्रत्यक्ष कामाला लवकरच सुरुवात होणार असून, पंढरीची वारी अधिक सुखकर होण्याचे स्वप्न सत्यात उतरणार आहे.