जागतिक पातळीवर भारताला घेरण्याचा प्रयत्न करणाऱ्या पाकिस्तानला पुन्हा एकदा तोंडावर पडावे लागले आहे. संयुक्त राष्ट्र सुरक्षा परिषदेच्या (UNSC) वार्षिक खुल्या चर्चेदरम्यान पाकिस्तानने नेहमीप्रमाणेच भारताचा अंतर्गत विषय असलेल्या जम्मू-काश्मीरचा मुद्दा उपस्थित केला. मात्र, भारताने यावेळी पाकिस्तानच्या या खोडसाळपणाचा केवळ तीव्र निषेधच केला नाही, तर त्यांचा क्रूर आणि हिंस्र इतिहास जगासमोर मांडत त्यांची बोलती पूर्णपणे बंद केली.
“स्वतःच्याच जनतेवर बॉम्ब टाकणाऱ्यांनी आम्हाला शिकवू नये!”
संयुक्त राष्ट्रांतील भारताचे स्थायी प्रतिनिधी, राजदूत हरीश पर्वथनेनी (Harish Parvathaneni) यांनी पाकिस्तानला अत्यंत कडक शब्दांत सुनावले. ते म्हणाले, “ज्या देशाचा इतिहासच नरसंहार (Genocide) आणि हिंसेने माखलेला आहे, त्यांनी भारताच्या अंतर्गत बाबींवर बोलणे हा निव्वळ दांभिकपणा आणि एक क्रूर विनोद आहे. स्वतःच्याच नागरिकांवर बॉम्ब टाकणाऱ्या आणि पद्धतशीरपणे नरसंहार घडवून आणणाऱ्या देशाकडून अशा हिंसक कृत्यांची अपेक्षा करणे यात काही नवल नाही.”
अफगाणिस्तानमधील त्या ‘अमानुष’ हल्ल्याची आठवण करून दिली
भारताने चालू वर्षात (मार्च २०२६ मध्ये) रमजानच्या पवित्र महिन्यात पाकिस्तानने अफगाणिस्तानात केलेल्या हवाई हल्ल्यांचा उल्लेख करत त्यांचा खरा चेहरा उघड केला. राजदूत पर्वथनेनी यांनी संयुक्त राष्ट्रांच्या अफगाणिस्तानमधील सहाय्यक मिशनचा (UNAMA) अहवाल उद्धृत केला. शांतता आणि संयम राखण्याच्या पवित्र महिन्यात पाकिस्तानने काबूलमधील ‘ओमिड ड्रग अडिक्शन ट्रीटमेंट हॉस्पिटल’वर (व्यसनमुक्ती केंद्र) अत्यंत निर्घृणपणे हवाई हल्ला केला होता.
संध्याकाळच्या ‘तरावीह’च्या प्रार्थनेनंतर रुग्ण मशिदीतून बाहेर पडत असताना पाकिस्तानने हा भ्याड हल्ला केला. लष्करी लक्ष्य नसलेल्या या रुग्णालयावरील हल्ल्यात २६९ निष्पाप नागरिकांचा मृत्यू झाला, तर १२२ जण गंभीर जखमी झाले होते. याशिवाय, पाकिस्तानच्या सीमापार हिंसेमुळे ९४,००० हून अधिक अफगाण नागरिकांना बेघर व्हावे लागले होते, अशी आकडेवारी भारताने जगासमोर ठेवली.
१९७१ च्या ‘ऑपरेशन सर्चलाईट’ची काळी पाने उलटली
पाकिस्तानची क्रूरता केवळ आजची नाही तर दशकांपासून चालत आलेली आहे, हे दाखवून देण्यासाठी भारताने १९७१ मधील ‘ऑपरेशन सर्चलाईट’ची आठवण करून दिली. तत्कालीन पूर्व पाकिस्तानात (आताचा बांगलादेश) पाकिस्तानी सैन्याने तिथल्या राष्ट्रवादी चळवळीला चिरडण्यासाठी अमानुष कृत्य केले होते. पाकिस्तान सरकारने स्वतःच्याच सैन्याला पाठिंबा देऊन तब्बल ४ लाख महिलांवर पद्धतशीरपणे सामूहिक बलात्कार आणि लाखो नागरिकांचा नरसंहार घडवून आणला होता.
अपयश लपवण्यासाठी पाकिस्तानचा कांगावा
राजदूत हरीश पर्वथनेनी पुढे म्हणाले की, पाकिस्तान आपल्या देशांतर्गत अपयशांवरून जगाचे लक्ष विचलित करण्यासाठी सीमापार हिंसाचार आणि दहशतवादाचा वापर करत आहे. ज्या देशात ना कायद्याचा आदर आहे, ना नैतिकतेचा, अशा देशाचा खोटा प्रचार आता संपूर्ण जगाला समजला आहे. सीमापार दहशतवादाला खतपाणी घालणाऱ्या आणि दहशतवाद्यांना आश्रय देणाऱ्या देशांना आता आंतरराष्ट्रीय पातळीवर जबाबदार धरलेच पाहिजे, असा कडक इशाराही भारताने दिला.
भारताच्या या आक्रमक पवित्र्यामुळे संयुक्त राष्ट्र सुरक्षा परिषदेत पाकिस्तान पूर्णपणे एकटा पडला असून, काश्मीरच्या नावाखाली सहानुभूती मिळवण्याचा त्यांचा प्रयत्न पुरता फसला आहे.