२०१३ मध्ये बॉक्स ऑफिसवर धुमाकूळ घालणारा आणि अवघ्या महाराष्ट्राला ‘तेरी मेरी यारी’च्या रंगात रंगवणारा चित्रपट म्हणजे ‘दुनियादारी’. श्रेयस, दिग्या, मीनू आणि शिरीन यांच्या मैत्री आणि प्रेमाची ही कथा प्रेक्षकांच्या मनावर अशी काही कोरली गेली की आजही हा सिनेमा टीव्हीवर लागला तरी लोक खिळून राहतात. या अफाट यशानंतर गेली अनेक वर्षे प्रेक्षक ‘दुनियादारी २’ची म्हणजेच या सिनेमाच्या सिक्वेलची चातकासारखी वाट पाहत होते. अनेकदा या सिक्वेलची घोषणा झाली, अगदी चित्रीकरण सुरू झाल्याच्या चर्चाही रंगल्या; पण चित्रपट काही पडद्यावर आला नाही. आता या संपूर्ण प्रकरणावर दिग्दर्शक संजय जाधव यांनी पूर्णविराम लावला असून, “मी भविष्यात कधीच दुनियादारी २ बनवणार नाही,” असा धक्कादायक पण स्पष्ट खुलासा त्यांनी केला आहे.
नुकतीच संजय जाधव यांनी सौमित्र पोटे यांच्या ‘मित्र म्हणे’ या लोकप्रिय यूट्यूब चॅनलला एक दिलखुलास मुलाखत दिली. या मुलाखतीदरम्यान त्यांनी ‘दुनियादारी २’ न बनवण्यामागची आपली खंत आणि त्यामागची खरी कारणं अत्यंत भावुक होऊन प्रेक्षकांसमोर मांडली.
“सोशल मीडियावर बोलणं सोपं असतं, पण त्यामागची मेहनत…” संजय जाधव म्हणाले की, “मी ‘दुनियादारी’पेक्षा ‘दुनियादारी २’ कितीही सुंदर आणि भव्य बनवला, तरी प्रेक्षक त्याची तुलना पहिल्या भागाशीच करणार. लोक सहज म्हणून जातील की, ‘अरे छे! पहिल्या भागासारखी मजा नाही आली यात.’ आजकाल सोशल मीडियावर बसून कोणावरही आणि कशावरही कमेंट करणे खूप सोपे झाले आहे, पण त्या कलाकृतीमागे आमची किती मेहनत असते, हे लोकांच्या लक्षात येत नाही. सतत होणारी ही नकारात्मक तुलना पचवणे आता माझ्या मानसिकतेला झेपणार नाही.”
दिवंगत लेखक सुहास शिरवळकर आणि मिळालेला तो ‘सिग्नल’ ‘दुनियादारी’ ही मूळची सुप्रसिद्ध लेखक सुहास शिरवळकर यांची कादंबरी आहे. सिक्वेलबद्दल बोलताना संजय जाधव यांनी एक अत्यंत रंजक आणि आध्यात्मिक विचार मांडला. ते म्हणाले, “दुनियादारी २ चा प्रोजेक्ट आजवर इतक्या वेळा ऑन झाला आणि पुन्हा ऑफ झाला… म्हणजेच त्याचे काम सुरू होऊन अनेकदा बंद पडले. आता मला कुठेतरी मनातून असे वाटते की, खुद्द स्वर्गातून सुहास शिरवळकर मला सांगत असावेत की, ‘संज्या, आता नको करू, राहू दे!’ मी तो एक संकेत (सिग्नल) मानला आहे आणि मला त्यांच्या त्या इच्छेचा, त्यांच्या लेखनाचा आदर राखायचा आहे.”
“दुनियादारी माझं बाळ आहे, पण आता लोकांचा स्क्रिप्टवर विश्वास नाही…” संजय जाधव अत्यंत भावुक होत पुढे म्हणाले, “‘दुनियादारी’ हा सिनेमा म्हणजे माझं बाळ आहे. त्यातलं चांगलं-वाईट जे काही आहे, ते मी प्रेमाने निर्माण केलंय. पण आज अशी परिस्थिती आली आहे की लोकांचा माझ्यावर किंवा माझ्या स्क्रिप्टवर विश्वास उरलेला नाही. मी जेव्हा जेव्हा या सिनेमाबद्दल बोलतो, तेव्हा लोक मला फक्त एकच विचारतात- ‘कास्टिंग तेच असणार ना? स्वप्नील, अंकुश, सई असणार ना?’ मला प्रेक्षकांना सांगायचं आहे की, त्या मूळ कलाकारांना सोडून मी हा सिनेमा बनवण्याचा विचारही करू शकत नाही. पण त्याचसोबत प्रेक्षकांनी माझ्या दिग्दर्शनावर आणि कष्टावरही थोडा विश्वास दाखवायला हवा. जर लोकांना माझ्यावर विश्वासच ठेवायचा नसेल, तर मग मलाही हा सिनेमा जबरदस्तीने बनवण्यात काहीच रस नाही.”
संजय जाधव यांच्या या स्पष्ट आणि प्रामाणिक वक्तव्यामुळे आता ‘दुनियादारी २’ची वाट पाहणाऱ्या चाहत्यांची निराशा झाली असली, तरी त्यांच्या या निर्णयामागील भावना प्रेक्षकांना नक्कीच पटणाऱ्या आहेत. त्यामुळे ‘दुनियादारी’ची तीच गोड आठवण मनात साठवून ठेवणे आता प्रेक्षकांच्या हाती आहे.