सोलापूर: विठूरायाच्या दर्शनासाठी पंढरपूरला जाणाऱ्या लाखो वारकऱ्यांसाठी आणि स्थानिक नागरिकांसाठी एक मोठी बातमी आहे. पंढरपूर शहराचा चेहरामोहरा बदलणाऱ्या ४,१३० कोटी रुपयांच्या भव्य विकास आराखड्याला राज्य सरकारने अधिकृत मंजुरी दिली आहे. मुख्यमंत्री देवेंद्र फडणवीस यांच्या अध्यक्षतेखाली झालेल्या महत्त्वपूर्ण बैठकीत या प्रकल्पावर शिक्कामोर्तब करण्यात आले असून, यंदाच्या आषाढी एकादशीचा सोहळा पार पडल्यानंतर प्रत्यक्ष कामाला सुरुवात होणार आहे.
नेमका काय आहे हा प्रकल्प? पंढरपूरला ‘जागतिक दर्जाचे तीर्थक्षेत्र’ बनवण्यासाठी हा विकास कॉरिडॉर (Corridor) उभारला जात आहे. यामध्ये चंद्रभागा नदीचा घाट परिसर, मंदिराचा प्रदक्षिणा मार्ग आणि भाविकांच्या निवासाच्या सोयींचा समावेश आहे. पुढील ३० महिन्यांत हे काम पूर्ण करण्याचे लक्ष्य प्रशासनासमोर ठेवण्यात आले आहे. यामुळे केवळ भाविकांची गैरसोय दूर होणार नाही, तर शहरात आधुनिक सोयी-सुविधांचे जाळे निर्माण होईल.
समर्थक आणि विरोधक आमनेसामने या भव्य प्रकल्पामुळे पंढरपूरचा विकास होणार असल्याने अनेक जण याचे स्वागत करत आहेत. मात्र, या विकास आराखड्यात काही स्थानिक व्यापाऱ्यांची दुकाने आणि नागरिकांची घरे बाधित होण्याची शक्यता आहे. यामुळे शहरात सध्या संमिश्र वातावरण आहे. काही स्थानिकांनी या प्रकल्पाला कडाडून विरोध केला आहे, तर काही बाधितांनी ‘योग्य पुनर्वसन’ आणि ‘न्याय्य मोबदला’ मिळाल्यास प्रकल्पाला पाठिंबा देण्याची तयारी दर्शवली आहे.
सरकारची भूमिका प्रशासनाने स्पष्ट केले आहे की, कोणावरही अन्याय होऊ न देता हा प्रकल्प राबवला जाईल. आषाढी वारीत कोणतीही अडचण येऊ नये म्हणून वारीनंतरच बांधकामाला सुरुवात केली जाईल.