स्पोर्ट्स डेस्क: इंडियन प्रीमियर लीग (IPL 2026) च्या ६७ व्या सामन्यात एक अटीतटीची लढत पाहायला मिळाली. सनरायझर्स हैदराबादने (SRH) रॉयल चॅलेंजर्स बंगळुरू (RCB) विरुद्ध तब्बल ५५ धावांनी दणदणीत विजय मिळवला. पण क्रिकेटमध्ये कधी कधी हारणाराही बाजीगर ठरतो, असंच काहीसं या सामन्यात घडलंय. हैदराबादने सामना जिंकला असला तरी खरी ‘लॉटरी’ मात्र बंगळुरूची लागली आहे. मैदानावर पराभूत होऊनही आरसीबीने गुणतालिकेत अव्वल (Top 2) स्थान पटकावले आहे.
नेमकं काय घडलं सामन्यात?
हैदराबादच्या राजीव गांधी आंतरराष्ट्रीय स्टेडियमवर झालेल्या या सामन्यात सनरायझर्स हैदराबादने प्रथम फलंदाजी करताना २५५ धावांचा डोंगर उभा केला होता. हैदराबादला टॉप-२ मध्ये जाण्यासाठी आरसीबीला १६० धावांच्या आत रोखणे गरजेचे होते, म्हणजेच किमान ९० पेक्षा जास्त धावांनी विजय हवा होता. मात्र, आरसीबीने २५६ धावांच्या आव्हानाचा पाठलाग करताना जिद्दीने फलंदाजी केली आणि २०० धावा फलकावर लावल्या. जरी आरसीबी हा सामना ५५ धावांनी हरली, तरी त्यांनी आवश्यक धावा केल्यामुळे त्यांचे नेट रन रेट (NRR) सुरक्षित राहिले.
गुणतालिकेचे समीकरण: आरसीबी आणि गुजरात फायनलच्या शर्यतीत पुढे
लीग स्टेजचे सर्व १४ सामने खेळून झाल्यानंतर आता प्लेऑफमधील टॉप-३ संघ निश्चित झाले आहेत:
१. रॉयल चॅलेंजर्स बंगळुरू (RCB): १८ गुण (+०.७८३ नेट रन रेट) – पहिलं स्थान
२. गुजरात टायटन्स (GT): १८ गुण (+०.६९५ नेट रन रेट) – दुसरं स्थान
३. सनरायझर्स हैदराबाद (SRH): १८ गुण (+०.५२४ नेट रन रेट) – तिसरं स्थान
हैदराबादने १८ गुण मिळवले खरे, पण खराब नेट रन रेटमुळे त्यांना तिसऱ्या क्रमांकावर समाधान मानावे लागले. याचा फायदा आरसीबी आणि गुजरात टायटन्सला झाला असून त्यांनी थेट ‘क्वालिफायर-१’ (Qualifier 1) मध्ये धडक मारली आहे.
काय सांगतो प्लेऑफचा नियम? आरसीबीला मिळणार २ मोठे चान्स!
आयपीएलच्या नियमांनुसार, गुणतालिकेत पहिल्या दोन क्रमांकावर राहणाऱ्या संघांना अंतिम फेरीत (Final) पोहोचण्यासाठी दोन संधी मिळतात.
-
क्वालिफायर १ (२६ मे, धर्मशाला): आरसीबी आणि गुजरात टायटन्स यांच्यात २६ मे रोजी धरमशाला येथे पहिला क्वालिफायर सामना खेळवला जाईल. या सामन्यात जो संघ जिंकेल, तो थेट ३१ मे रोजी अहमदाबादमध्ये होणाऱ्या महाअंतिम फेरीत प्रवेश करेल.
-
दुसरी सुवर्णसंधी: क्वालिफायर-१ मध्ये पराभूत होणाऱ्या संघाचा प्रवास इथेच संपत नाही. त्या संघाला ‘एलिमिनेटर’ सामन्यातील विजेत्या संघासोबत ‘क्वालिफायर-२’ खेळण्याची आणखी एक संधी मिळेल. म्हणजेच आरसीबीला फायनल गाठण्यासाठी आता दुहेरी सुरक्षा कवच मिळाले आहे.
हैदराबादसाठी खडतर प्रवास, ‘या’ संघांमध्ये चौथी जागा मिळवण्यासाठी लढत
तिसऱ्या क्रमांकावर राहिलेल्या सनरायझर्स हैदराबादला आता २७ मे रोजी ‘एलिमिनेटर’ (Eliminator) सामना खेळावा लागेल. या सामन्यात पराभूत होणारा संघ थेट स्पर्धेतून बाहेर पडेल, त्यामुळे हैदराबादसाठी आता प्रत्येक सामना ‘करो या मरो’ असा असणार आहे. हैदराबादचा सामना गुणतालिकेतील चौथ्या क्रमांकाच्या संघाशी होईल. सध्या चौथ्या जागेसाठी राजस्थान रॉयल्स, पंजाब किंग्स, कोलकाता नाईट रायडर्स आणि दिल्ली कॅपिटल्स यांच्यात तीव्र चुरस पाहायला मिळत आहे.