हितेंद्र ठाकुरांची बविआ शिवसेनेत विलीन होणार? एकनाथ शिंदेंची ठाणे विधान परिषदेसाठी मोठी खेळी!

मुंबई/ठाणे: महाराष्ट्र राजकारणात सध्या आगामी विधान परिषद निवडणुकीवरून चांगलीच रणधुमाळी सुरू आहे. अशातच आता ठाणे जिल्ह्यातून एक अत्यंत धक्कादायक आणि मोठी राजकीय बातमी समोर येत आहे. वसई-विरार पट्ट्यात गेल्या अनेक दशकांपासून एकहाती वर्चस्व राखणारे ‘बहुजन विकास आघाडी’ (BVA) पक्षाचे सर्वेसर्वा हितेंद्र ठाकूर हे थेट मुख्यमंत्री एकनाथ शिंदे यांच्या शिवसेनेत आपला पक्ष विलीन करणार असल्याची जोरदार चर्चा राजकीय वर्तुळात रंगली आहे.

काय आहे एकनाथ शिंदेंचा प्लॅन? सूत्रांकडून मिळालेल्या अत्यंत विश्वसनीय माहितीनुसार, मुख्यमंत्री एकनाथ शिंदे यांनी ठाणे विधान परिषद जिंकण्यासाठी आणि महायुतीची ताकद वाढवण्यासाठी एक मोठी खेळी खेळली आहे. त्यांनी हितेंद्र ठाकूर आणि त्यांचे सुपुत्र क्षितिज ठाकूर यांच्यासमोर बहुजन विकास आघाडी थेट शिवसेनेत विलीन करण्याचा प्रस्ताव ठेवल्याचे समजते. प्रहार संघटनेनंतर आता बविआसारखा मोठा स्थानिक पक्ष आपल्या बाजूने खेचून एकनाथ शिंदे संपूर्ण राज्याला मोठा धक्का देण्याच्या तयारीत आहेत.

रवींद्र फाटकांचा पत्ता कट होणार? क्षितिज ठाकूरांना लॉटरी लागणार? या संपूर्ण राजकीय घडामोडींमुळे ठाणे विधान परिषदेच्या जागेसाठी शिवसेनेकडून इच्छुक असलेले माजी आमदार रवींद्र फाटक यांच्या उमेदवारीवर टांगती तलवार निर्माण झाली आहे. राजकीय वर्तुळातील चर्चेनुसार, हितेंद्र ठाकूर यांचे सुपुत्र क्षितिज ठाकूर यांना शिवसेना ठाणे विधान परिषदेच्या रिंगणात उतरवू शकते. विशेष म्हणजे, या सर्व चर्चा सुरू असतानाच रवींद्र फाटक यांनी स्वतः वसईत जाऊन ठाकूर पिता-पुत्रांची भेट घेतली आहे, ज्यामुळे या निवडणुकीला एक वेगळंच वळण मिळालं आहे.

हितेंद्र ठाकूर अचानक ठाण्याच्या दिशेने रवाना! या सर्व राजकीय खलबतांच्या दरम्यान, हितेंद्र ठाकूर हे अचानक आपल्या खाजगी गाडीने ठाण्याच्या दिशेने रवाना झाल्यामुळे सर्वांच्याच भुवया उंचावल्या आहेत. ते वैयक्तिक कामानिमित्त जात असल्याचे सांगितले जात असले, तरी सध्याच्या तणावाच्या वातावरणात ते ठाण्यात कोणाची भेट घेतात, याकडे संपूर्ण महाराष्ट्राचे लक्ष लागले आहे.

वसई-विरारमधील ‘७१’ नगरसेवकांचे संख्याबळ ठरणार ‘गेमचेंजर’ वसई-विरार महानगरपालिकेत बहुजन विकास आघाडीची एकहाती सत्ता आहे. पक्षाकडे तब्बल ७१ नगरसेवकांचे भक्कम संख्याबळ आहे. विधान परिषदेच्या स्थानिक स्वराज्य संस्था मतदारसंघात ही मते अत्यंत निर्णायक ठरतात. जर बविआने शिवसेनेला पाठिंबा दिला किंवा पक्षात विलीनीकरण केले, तर महायुतीच्या उमेदवाराचा विजय अगदी सोपा होईल. मात्र, उमेदवारीबाबतचा अंतिम निर्णय स्वतः मुख्यमंत्री एकनाथ शिंदे घेतील.

असा आहे विधान परिषद निवडणुकीचा कार्यक्रम: महायुतीच्या जागावाटपात शिवसेनेला ठाणे, नाशिक, यवतमाळ आणि परभणी अशा ४ जागा मिळाल्याची चर्चा आहे. या जागांसाठीचा निवडणूक कार्यक्रम पुढीलप्रमाणे आहे:

• अधिसूचना जारी: २५ मे

• अर्ज भरण्याची शेवटची तारीख: १ जून

• अर्जाची छाननी: २ जून

• अर्ज माघारी घेण्याची तारीख: ४ जून

• मतदान: १८ जून (सकाळी ८ ते दुपारी ४)

• मतमोजणी व निकाल: २२ जून

आता मुख्यमंत्री एकनाथ शिंदेंचा हा विलीनीकरणाचा डाव यशस्वी होतो का आणि क्षितिज ठाकूर ठाण्यातून रिंगणात उतरतात का, हे पाहणे महत्त्वाचे ठरेल.