मुंबई: ९० च्या दशकातील मुलांचा लाडका सुपरहिरो ‘शक्तिमान’ पुन्हा एकदा मोठ्या पडद्यावर परतणार असल्याच्या चर्चांनी सध्या जोर धरला आहे. मात्र, या चित्रपटात शक्तिमानची मुख्य भूमिका कोण साकारणार, यावरून सध्या मोठे वादंग निर्माण झाले आहेत. बॉलिवूडचा ऊर्जावान अभिनेता रणवीर सिंग याचे नाव या भूमिकेसाठी आघाडीवर असतानाच, मूळ ‘शक्तिमान’ म्हणजेच ज्येष्ठ अभिनेते मुकेश खन्ना यांनी या कास्टिंगला तीव्र विरोध दर्शवला आहे.
नेमकं प्रकरण काय? गेल्या काही दिवसांपासून सोशल मीडियावर रणवीर सिंग ‘शक्तिमान’ साकारणार असल्याच्या बातम्या व्हायरल होत आहेत. मात्र, मुकेश खन्ना यांना ही निवड अजिबात मान्य नाही. त्यांच्या मते, शक्तिमान हे केवळ एक पात्र नसून तो एक ‘शिक्षक’ आणि ‘संस्कार’ आहे. रणवीर सिंगच्या प्रतिभेवर खन्ना यांचा आक्षेप नसला तरी, त्याच्या प्रतिमेबद्दल त्यांनी प्रश्न उपस्थित केले आहेत.
रणवीरच्या ‘त्या’ फोटोशूटचा उल्लेख मुकेश खन्ना यांनी रणवीरच्या एका जुन्या नग्न फोटोशूटचा संदर्भ देत त्याला सुनावले आहे. ते म्हणाले की, “अशा प्रकारची प्रतिमा असलेला अभिनेता शक्तिमानसारख्या पावन आणि मार्गदर्शक पात्रासाठी योग्य ठरू शकत नाही. जर कोणाला शरीरप्रदर्शन करायचे असेल, तर त्याने इतर देशांत जाऊन तसे चित्रपट करावेत, पण शक्तिमानच्या भूमिकेशी छेडछाड खपवून घेतली जाणार नाही.”
माझं कोटींचं नुकसान झालं तरी चालेल, पण… या भूमिकेसाठी रणवीरने मुकेश खन्ना यांच्या ऑफिसमध्ये जाऊन तासनतास त्यांची भेट घेतली, त्यांना पटवून देण्याचा प्रयत्न केला. सोनी पिक्चर्स सारखे मोठे निर्मातेही रणवीरला घेण्यास उत्सुक आहेत. मात्र, मुकेश खन्ना आपल्या निर्णयावर ठाम आहेत. “माझं कोट्यवधींचं नुकसान झालं तरी चालेल, पण मी चुकीच्या व्यक्तीला शक्तिमानचा वारसा सोपवणार नाही,” असे खणखणीत उत्तर त्यांनी दिले आहे.
आता या वादामुळे चित्रपट लांबणीवर पडणार की निर्माते नवीन चेहऱ्याचा शोध घेणार, हे पाहणे औत्सुक्याचे ठरेल.