पुणे: “आज आपला मराठी माणूस इतका जातीपातीत विभागला गेला आहे आणि इतका बेसावध झाला आहे की, असा माणूस संपूर्ण पृथ्वीतलावर शोधूनही सापडणार नाही,” अशा कडक शब्दांत मनसे प्रमुख राज ठाकरे यांनी आपली व्यथा मांडली. पुण्यातील एका जाहीर कार्यक्रमात बोलताना त्यांनी मराठी अस्मिता, राजकारण आणि समाजकारणावर भाष्य करत राज्यातील सद्यस्थितीवर बोट ठेवले.
महापुरुषांना जातीत अडकवले! राज ठाकरे म्हणाले की, आम्ही आमच्या थोर महापुरुषांना सुद्धा जातीच्या चौकटीत बंदिस्त केले आहे. लोकमान्य टिळक, महात्मा फुले, डॉ. बाबासाहेब आंबेडकर किंवा छत्रपती शिवाजी महाराज असोत—आम्ही त्यांना विशिष्ट जातीचे प्रतिनिधी मानू लागलो आहोत. इतकेच नाही, तर आजचा वाचक पुस्तक विकत घेताना विषयापेक्षा लेखकाची जात पाहतो, ही अतिशय दुर्दैवी बाब असल्याचे त्यांनी नमूद केले.
राजकारण्यांचे बिल्डरांपुढे लोटांगण राज्यातील नेत्यांवर टीका करताना ते म्हणाले की, आजचे राजकारणी बिल्डर आणि मोठ्या उद्योगपतींच्या दावणीला बांधले गेले आहेत. त्यांच्यापुढे ‘सरेंडर’ झाल्यामुळेच महाराष्ट्रावरील आमची पकड निसटत चालली आहे. परप्रांतीय रिक्षाचालक जेव्हा ‘आम्ही मराठी बोलणार नाही’ अशी मुजोरी करतात, तेव्हा सरकार त्यांना सवलत देते. “हिंमत असेल तर त्यांचे परवाने रद्द करून दाखवा,” असे थेट आव्हान त्यांनी सरकारला दिले.
मराठी भाषेचा विसर आणि ‘हिंदी’चे आक्रमण शिवछत्रपतींनी मोगलांच्या काळातील फारसी भाषेचा प्रभाव कमी करण्यासाठी ‘मराठी शब्दकोश’ तयार केला होता. पण आज आपण आपलीच भाषा विसरून भांडतानाही हिंदीचा आधार घेतो, ही शरमेची गोष्ट आहे. मंगल प्रभात लोढांसारखे मंत्री जेव्हा केवळ एका विशिष्ट समाजासाठी सुविधा जाहीर करतात, तेव्हा त्यांना जाब विचारणारा मराठी माणूस दिसत नाही, कारण आपण अंगावर जात नाही, अशी टीकाही त्यांनी केली.
सांस्कृतिक वारसा आणि बदल महाराष्ट्राला संतांची मोठी परंपरा लाभली आहे. संत गाडगेबाबांनी स्वच्छतेचा संदेश दिला, पण आजच्या ‘स्वच्छ भारत’ मोहिमेत त्यांना योग्य स्थान मिळाले नाही, अशी खंत त्यांनी व्यक्त केली. “कुठेही जा, समोरचा कितीही हिंदीत बोलला तरी तुम्ही मराठीतच उत्तर द्या, मग बघा तो कसा मराठीत बोलतो,” असा मोलाचा सल्लाही त्यांनी यावेळी उपस्थितांना दिला.