माणुसकीला काळीमा फासणारी एक अत्यंत हृदयद्रावक घटना नागपूरच्या नंदनवन परिसरात समोर आली आहे. एका उच्चशिक्षित इंजिनिअर तरुण मुलीने आणि तिच्या आईने राहत्या घरी गळफास घेऊन आपली जीवनयात्रा संपवली. सासरच्या मंडळींकडून होणाऱ्या सततच्या मानसिक आणि शारीरिक छळाला कंटाळून या दोघींनी हे टोकाचे पाऊल उचलल्याचे प्राथमिक तपासात समोर आले आहे.
काय आहे नेमकी घटना? आकांक्षा बर्म्हे ही एक तरुण इंजिनिअर होती. तिचे लग्न झाले होते आणि ती गरोदर होती. मात्र, काही दिवसांपूर्वी एका दुर्दैवी घटनेत तिचे बाळ गर्भातच दगावले. या नैसर्गिक संकटामुळे आधीच कोलमडलेल्या आकांक्षाला सांत्वन मिळण्याऐवजी सासरच्यांकडून अधिकच त्रास दिला जाऊ लागला. बाळ दगावल्याचा ठपका ठेवत सासरच्या मंडळींनी तिचा छळ सुरू केला. आपल्या पोटच्या लेकीची ही अवस्था पाहून तिची आई संगीता श्रीराम ढबाले (व्यवसायाने शिक्षिका) यादेखील प्रचंड तणावाखाली होत्या.
रात्रीच्या वेळी घेतला गळफास सासरचा छळ असह्य झाल्यामुळे, अखेर नैराश्याच्या गर्तेत गेलेल्या माय-लेकीने रात्रीच्या सुमारास घरातील लोखंडी अँगलला दोरी बांधून आत्महत्या केली. सकाळी ही घटना उघडकीस येताच परिसरात एकच खळबळ माजली. एका बाजूला सुशिक्षित समाज आणि दुसरीकडे अजूनही टिकून असलेली ही हुंडा किंवा छळाची मानसिकता, यामुळे संताप व्यक्त केला जात आहे.
पोलिसांची कारवाई सुरू नंदनवन पोलिसांनी तातडीने घटनास्थळी पोहोचून पंचनामा केला असून दोन्ही मृतदेह शवविच्छेदनासाठी पाठवले आहेत. आकांक्षाच्या नातेवाईकांनी सासरच्या लोकांवर गंभीर आरोप केले असून, त्यांच्याविरोधात कठोर कारवाई करण्याची मागणी केली आहे. पोलिसांनी या प्रकरणी गुन्हा दाखल करण्याची प्रक्रिया सुरू केली असून, सासरच्या मंडळींची चौकशी केली जात आहे.