मराठी मालिका विश्वातील लोकप्रिय अभिनेत्री, ‘ठिपक्यांची रांगोळी’ फेम ज्ञानदा रामतीर्थकर हिने आपल्या आयुष्याच्या नव्या इनिंगला सुरुवात केली आहे. तिचा दीर्घकाळचा मित्र आणि प्रसिद्ध सिनेमॅटोग्राफर हर्षद आत्माराम याच्याशी ज्ञानदाने ८ मे २०२६ रोजी पुण्यात विवाहगाठ बांधली. गेल्या काही दिवसांपासून सोशल मीडियावर या लग्नाची जोरदार चर्चा होती आणि अखेर या जोडीचे सुंदर फोटो समोर आले आहेत.
पारंपरिक लूकने वेधले चाहत्यांचे लक्ष या विवाहसोहळ्याचे खास वैशिष्ट्य म्हणजे या जोडीचा अस्सल मराठमोळा पेहराव. लग्नाच्या मुख्य विधींसाठी ज्ञानदाने जांभळ्या रंगाची नऊवारी साडी, नाकात नथ आणि पारंपरिक दागिन्यांचा साज चढवला होता. तर हर्षदने धोतर, कुर्ता आणि त्यावर शेला-टोपी असा रुबाबदार लूक केला होता. रिसेप्शनसाठी ज्ञानदाने गुलाबी रंगाची भरजरी साडी नेसली होती, ज्यामध्ये तिचे सौंदर्य अधिकच खुलून दिसत होते.
मैत्रीचं रूपांतर प्रेमात आणि आता संसारात! हर्षद आणि ज्ञानदा हे एकमेकांना अनेक वर्षांपासून ओळखतात. त्यांची मैत्री आणि त्यानंतर प्रेमाचा हा प्रवास आता लग्नापर्यंत पोहोचला आहे. डिसेंबर २०२५ मध्ये या जोडीचा साखरपुडा (साक्षीगंध) झाला होता. पुण्यात पार पडलेल्या या दिमाखदार सोहळ्याला मराठी चित्रपट आणि मालिका सृष्टीतील अनेक कलाकार, मित्र-मैत्रिणी आणि जवळचे नातेवाईक उपस्थित होते.
सध्या ज्ञानदा ‘लग्नानंतर होईलच प्रेम’ या मालिकेतून प्रेक्षकांच्या भेटीला येत आहे. लग्नानंतर सोशल मीडियावर चाहत्यांनी आणि कलाकारांनी या गोड जोडीवर शुभेच्छांचा वर्षाव केला आहे.