भारतीय क्रिकेट संघातील फिरकीपटू युजवेंद्र चहल (Yuzi Chahal) आणि प्रसिद्ध आरजे व अभिनेत्री महवश (RJ Mahvash) यांच्यातील नात्याची गेल्या अनेक महिन्यांपासून सोशल मीडियावर जोरदार चर्चा सुरू आहे. काही महिन्यांपूर्वी या दोघांनी अचानक इंस्टाग्रामवर एकमेकांना अनफॉलो केल्यामुळे त्यांच्यात काहीतरी बिनसल्याच्या आणि ब्रेकअपच्या अफवांना उधाण आले होते. आता या संपूर्ण वादावर आरजे महवशने अखेर आपले मौन सोडले असून त्यांच्या नात्याचे खरे सत्य जगासमोर आणले आहे.
“लोकांना राईचा पर्वत करण्याची सवय असते…” नुकत्याच दिलेल्या एका मुलाखतीत महवशला युजवेंद्र चहलला सोशल मीडियावर अनफॉलो करण्याबद्दल विचारण्यात आले. त्यावर अत्यंत थेट आणि बिंधास्त उत्तर देत ती म्हणाली, “लोकांना छोट्या छोट्या गोष्टींचा मोठा गवगवा करण्याची सवय असते. पण प्रत्यक्षात परिस्थिती तितकी गंभीर नसते. दोन मित्रांमध्ये वाद झाला आणि रागाच्या भरात त्यांनी एकमेकांना अनफॉलो केले, ही अगदी सामान्य गोष्ट आहे. हे प्रकरण तिथेच संपायला हवे.”
ती पुढे म्हणाली, “ज्या मित्रांसोबत तुम्ही मनमोकळेपणाने काहीही बोलू शकता, चहावर चर्चा करू शकता आणि वाईट जोक्सवरही हसू शकता, त्यांच्याबद्दल मनात कोणताही आकस किंवा राग ठेवू नये. मी आजही त्याला भविष्यासाठी शुभेच्छाच देईन. यात फार मोठी समस्या करून पाहण्यासारखं काहीच नाही.”
नात्यात कोणताही रोमँटिक अँगल नव्हता! दोघांमध्ये मैत्रीपेक्षा काही अधिक होते का? या सर्वात मोठ्या प्रश्नाचे उत्तर देताना महवशने स्पष्ट केले की, त्यांच्यात कधीही कोणताही लव्ह अफेअर किंवा रोमँटिक अँगल नव्हता.
तिने सांगितले, “मी त्याची नेहमीच एक चांगली मैत्रीण राहिले आहे. जेव्हा युजवेंद्रचा (धनश्री वर्मासोबत) घटस्फोट झाला, तो त्याच्या आयुष्यातील अत्यंत कठीण आणि भावनिक काळ होता. त्या काळात त्याला एका खऱ्या आणि चांगल्या मित्राची गरज होती. आम्ही सर्व मित्रांनी त्यावेळी त्याला मानसिक आधार देण्यावर आणि आयपीएल (IPL) सीझनवर लक्ष केंद्रित करण्यासाठी मदत केली. मी त्याच्या पाठीशी एक खंबीर सपोर्ट सिस्टिम म्हणून उभी राहिले. आम्ही पूर्वी जसे भेटायचो, तसेच पुढेही भेटू. कोणत्याही भीतीशिवाय मी माझ्या मित्राच्या पाठीशी उभी राहीन.”
वर्क फ्रंटवर काय करतेय महवश? आरजे म्हणून प्रसिद्ध असलेल्या महवशने आता अभिनयाच्या जगातही पाऊल टाकले आहे. दुर्जय दत्ता यांच्या प्रसिद्ध कादंबरीवर आधारित ‘प्यार पैसा प्रॉफिट’ या वेब सीरिजमधून तिने डिजिटल डेब्यू केला आहे. तसेच, लवकरच तिची ‘सतरंगी: बदले का खेल’ ही सीरिज रिलीज होणार आहे. याशिवाय ती प्रसिद्ध कोरिओग्राफर आणि दिग्दर्शक रेमो डिसूझाच्या ‘टेढी है पर मेरी है’ या आगामी रोमँटिक कॉमेडी चित्रपटाचे शूटिंगही करत आहे.
दुसरीकडे, युजवेंद्र चहलनेही काही दिवसांपूर्वी एका पॉडकास्टमध्ये महवशसोबतच्या डेटिंगच्या अफवा फेटाळून लावल्या होत्या आणि तिला नाहक ट्रोल करणाऱ्यांना सुनावले होते. महवशच्या या ताज्या खुलाशानंतर आता या दोघांच्या नात्याभोवती असलेल्या चर्चांना पूर्णविराम मिळण्याची शक्यता आहे.