पुणे: महाराष्ट्र राज्य माध्यमिक व उच्च माध्यमिक शिक्षण मंडळाने (MSBSHSE) घेतलेल्या बारावीच्या परीक्षेचा निकाल अखेर जाहीर झाला आहे. गेल्या अनेक दिवसांपासून विद्यार्थी आणि पालकांमध्ये असलेली उत्सुकता आता संपली असून, राज्याचा एकूण निकाल ८९.७९ टक्के लागला आहे. आज दुपारी १ वाजल्यापासून विद्यार्थ्यांना बोर्डाच्या अधिकृत वेबसाइटवर आपला वैयक्तिक निकाल पाहता येणार आहे.
कोकण विभागाचा दबदबा कायम दरवर्षीप्रमाणे यंदाही निकालात कोकण विभागाने आपले वर्चस्व टिकवून ठेवले आहे. कोकण विभागाचा निकाल सर्वाधिक ९४.१४ टक्के लागला असून तो राज्यात अव्वल ठरला आहे. दुसरीकडे, सर्वात कमी निकाल मुंबई विभागाचा लागला आहे. पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर आणि कोकण अशा नऊ विभागीय मंडळांमार्फत ही परीक्षा घेण्यात आली होती.
मुलींनी मारली बाजी निकालाच्या आकडेवारीनुसार, यंदाही मुलींनी मुलांच्या तुलनेत सरस कामगिरी केली आहे. उत्तीर्ण होणाऱ्या मुलींचे प्रमाण मुलांपेक्षा जास्त आहे. ही परंपरा यंदाही कायम राहिल्याने विद्यार्थिनींचे सर्वत्र कौतुक होत आहे.
असा तपासा तुमचा निकाल: १. सर्वात आधी बोर्डाच्या अधिकृत वेबसाइट mahresult.nic.in वर जा. २. होमपेजवर ‘HSC Examination Result 2026’ या लिंकवर क्लिक करा. ३. आपला रोल नंबर (Seat Number) आणि आईचे नाव अचूक टाइप करा. ४. ‘View Result’ बटणावर क्लिक करताच तुमचा निकाल स्क्रीनवर दिसेल. ५. भविष्यातील वापरासाठी निकालाची प्रिंट आऊट किंवा स्क्रीनशॉट काढून ठेवा.
यंदाची परीक्षा गैरप्रकारमुक्त होण्यासाठी बोर्डाने कडक पावले उचलली होती. संपूर्ण राज्यभरात कॉपी रोखण्यासाठी भरारी पथके तैनात करण्यात आली होती. परीक्षेत पारदर्शकता राखण्यासाठी काही कर्मचाऱ्यांवर निलंबनाची कारवाई देखील करण्यात आली आहे.