मराठी चित्रपटसृष्टीला ‘सैराट’ या सिनेमाने एक वेगळीच उंची गाठून दिली. या चित्रपटातील आर्ची आणि परशा जितके गाजले, तितकेच प्रेक्षकांच्या पसंतीस उतरले ते म्हणजे परशाचे दोन जीवाभावाचे मित्र – लंगड्या आणि सल्या. यात ‘सल्या’ची भूमिका साकारणारा अभिनेता अरबाज शेख सध्या सोशल मीडियावर प्रचंड चर्चेत आहे. अरबाजने नुकतेच त्याच्या लग्नाचे फोटो शेअर करत सर्वांना सुखद धक्का दिला आहे, पण खरी बातमी तर पुढेच आहे!
३ वर्षांपूर्वीच अडकला लग्नाच्या बेडीत! अरबाजने अलीकडेच सोशल मीडियावर त्याच्या निकाहचे फोटो पोस्ट केले, ज्यामुळे तो आता लग्नबंधनात अडकला आहे असं चाहत्यांना वाटलं. मात्र, एका मुलाखतीत त्याने मोठा खुलासा केला आहे. अरबाजचे लग्न आता नाही, तर तब्बल ३ वर्षांपूर्वीच झाले आहे. “आमचे लग्न ३ वर्षांपूर्वीच झाले होते, पण ते फोटो कधी पोस्ट करायचे या विचारात बराच वेळ निघून गेला. अखेर आता आम्ही ते फोटो चाहत्यांसोबत शेअर करण्याचे ठरवले,” असे अरबाजने आवर्जून सांगितले.
लहानपणापासूनची मैत्री अन् सिमरनची साथ अरबाजची पत्नी सिमरन ही त्याची लहानपणापासूनची मैत्रीण आहे. पहिली ते पाचवीपर्यंत ते दोघे एकाच शाळेत शिकत होते. त्यानंतर सिमरन शिक्षणासाठी पुण्याला निघून गेली. अरबाज सांगतो की, त्याला सिमरन लहानपणापासूनच आवडायची. ‘सैराट’ चित्रपटात काम करण्यापूर्वीच त्याने तिला प्रपोज केले होते. या दोघांची जात एकच असल्यामुळे घरच्यांकडूनही लग्नासाठी कोणताही विरोध झाला नाही.
स्वत:ला सिद्ध करण्यासाठी घेतली ‘सैराट’ची मदत अरबाजला सिमरनवर मनापासून प्रेम होते, पण एका साध्या गावाकडच्या मुलाला मुलीचे वडील मुलगी का देतील? हा प्रश्न त्याला सतावत होता. सिमरनच्या आई-वडिलांनी त्याला नाकारू नये, यासाठी अरबाजला स्वतःला सिद्ध करायचे होते. नेमकी त्याच वेळी त्याला नागराज मंजुळे यांच्या ‘सैराट’ चित्रपटाची ऑफर मिळाली. “जर मी या क्षेत्रात स्वतःचं नाव कमावलं, तर तिच्या घरच्यांकडून होकार मिळवणं सोपं जाईल,” असा विचार करून त्याने सिमरनला मिळवण्यासाठी अतोनात कष्ट घेतले.
आज अरबाजची पत्नी सिमरन आयटी (IT) क्षेत्रात कार्यरत आहे. या दोघांच्या लग्नाचे फोटो सध्या इंटरनेटवर व्हायरल होत असून, ‘सल्या’च्या या खऱ्या आयुष्यातील आर्चीची म्हणजेच सिमरनची सर्वत्र चर्चा रंगली आहे.