मुंबई: मराठी टेलिव्हिजनवरील लोकप्रिय चेहरा आणि ‘महाराष्ट्राची फेव्हरेट एक्सप्रेशन क्वीन’ म्हणून ओळखली जाणारी अभिनेत्री शिल्पा ठाकरे आता एका नव्या आणि आव्हानात्मक भूमिकेत प्रेक्षकांसमोर येणार आहे. आजवर मुख्य आणि सकारात्मक भूमिकांमधून प्रेक्षकांच्या मनावर राज्य करणाऱ्या शिल्पाने आता चक्क ‘खलनायिका’ साकारण्याचा धाडसी निर्णय घेतला आहे. सन मराठीवरील गाजलेली मालिका ‘इन्स्पेक्टर मंजू’मध्ये तिची ही एन्ट्री होणार असून, यामुळे मालिकेच्या कथानकाला एक मोठे आणि अनपेक्षित वळण मिळणार आहे.
अनुष्का पाटीलच्या रूपात शिल्पाचा नवा अवतार शिल्पा ठाकरे या मालिकेत ‘अनुष्का पाटील’ ही व्यक्तिरेखा साकारणार आहे. ही केवळ एक साधी खलनायिका नसून, तिच्या येण्यामागे एक गूढ रहस्य दडलेले आहे. शिल्पाने याआधी ‘नवी जन्मेन मी’ या मालिकेतून घराघरात ओळख निर्माण केली होती. तसेच ‘प्रेमा’, ‘परफ्युम’, ‘ट्रिपल सीट’ आणि ‘भिरकीट’ यांसारख्या चित्रपटांतून आपल्या अभिनयाची चुणूक दाखवली आहे. मात्र, करिअरच्या या वळणावर साचेबद्ध भूमिका नाकारून तिने ही नकारात्मक भूमिका स्वीकारली आहे.
का स्वीकारली ही भूमिका? आपल्या या निर्णयाबद्दल बोलताना शिल्पा म्हणाली, “नेहमी सकारात्मक भूमिकांमध्ये दिसल्यामुळे जेव्हा मला या नकारात्मक भूमिकेची ऑफर आली, तेव्हा मी सुरुवातीला थोडी साशंक होते. प्रेक्षक मला या रूपात स्वीकारतील का? अशी भीती वाटली होती. पण अनुष्काचे पात्र केवळ क्रूर नाही, तर तिच्या मागे काही वेदना आणि गुपिते आहेत. एक कलाकार म्हणून मला स्वतःला काहीतरी वेगळे सिद्ध करायचे होते, म्हणून मी हे आव्हान स्वीकारले.”
मालिकेत काय घडणार? सध्या ‘इन्स्पेक्टर मंजू’ मालिकेमध्ये रंजक वळण आले आहे. ज्या सत्याला पकडण्यासाठी मंजू साताऱ्यात आली होती, त्याच सत्याच्या ती प्रेमात पडली आहे. आता अनुष्काच्या एन्ट्रीमुळे मंजू आणि सत्याच्या आयुष्यात कोणते वादळ येते, अनुष्काचा भूतकाळ काय आहे आणि ती सूडाच्या भावनेने का पेटली आहे, हे पाहणे प्रेक्षकांसाठी रंजक ठरेल.
शिल्पा ठाकरेचा हा नवा ‘स्वॅग’ पाहण्यासाठी प्रेक्षक नक्कीच उत्सुक आहेत.