बॉलिवूडचा ‘मल्टीटॅलेंटेड’ अभिनेता आयुष्मान खुराना सध्या त्याच्या आगामी ‘पती पत्नी और वो २’ या चित्रपटामुळे चर्चेत आहे. चित्रपटाचा टीझर नुकताच प्रदर्शित झाला असून, चाहत्यांमध्ये या सिनेमाबद्दल प्रचंड उत्सुकता पाहायला मिळत आहे. पण, आता या चित्रपटाबाबत एक मोठी अपडेट समोर आली आहे. सिनेमागृहात प्रदर्शित होण्यापूर्वीच या चित्रपटाने निर्मात्यांच्या खिशात मोठी रक्कम टाकली आहे.
प्रदर्शनाआधीच कोट्यवधींची उड्डाणे
मिळालेल्या माहितीनुसार, ‘पती पत्नी और वो २’ चे ब्रॉडकास्ट राइट्स (टीव्हीवर दाखवण्याचे हक्क) तब्बल ३५ कोटी रुपयांना विकले गेले आहेत. चित्रपट प्रदर्शनापूर्वीच एवढी मोठी रक्कम मिळवणे ही निर्मात्यांसाठी खूप जमेची बाजू मानली जात आहे. आयुष्मान खुरानाचा चाहता वर्ग आणि त्याच्या चित्रपटांची कौटुंबिक मनोरंजनाची ओळख यामुळे या चित्रपटाला चांगला भाव मिळाला आहे.
काय आहे चित्रपटाची कथा?
२०१९ मध्ये आलेल्या ‘पती पत्नी और वो’ या सुपरहिट चित्रपटाचा हा दुसरा भाग आहे. मात्र, यावेळी स्टारकास्ट पूर्णपणे बदलण्यात आली आहे. या भागात आयुष्मान खुराना ‘प्रजापती पांडे’ नावाच्या पात्रात दिसणार आहे. त्याच्या आयुष्यात यावेळी एक किंवा दोन नाही, तर तब्बल तीन महिलांची एन्ट्री होणार आहे. सारा अली खान, रकुल प्रीत सिंह आणि वामिका गब्बी या तिघींसोबत आयुष्मानची होणारी फजिती प्रेक्षकांना खळखळून हसवणार आहे.
कधी होणार प्रदर्शित?
हा एक पूर्णपणे कौटुंबिक मनोरंजन करणारा (Family Entertainer) चित्रपट असून १५ मे २०२६ रोजी तो मोठ्या पडद्यावर दाखल होणार आहे. चित्रपटात विजय राज देखील एका महत्त्वपूर्ण भूमिकेत दिसणार आहेत. निर्मात्यांना अपेक्षा आहे की, चित्रपट बॉक्स ऑफिसवर सहज ६५ कोटींची कमाई करून आपला खर्च वसूल करेल.