मुंबई: महाराष्ट्र विधान परिषदेच्या आगामी निवडणुकीसाठी राजकीय वातावरण चांगलेच तापले आहे. प्रत्येक हालचालीकडे राजकीय वर्तुळाचे लक्ष लागलेले असतानाच, भारतीय जनता पक्षाच्या गोटातून एक मोठी बातमी समोर येत आहे. उमेदवारांच्या निवडीसाठी सुरू असलेल्या रस्सीखेचमध्ये आता दिल्लीतील केंद्रीय नेतृत्वाने थेट हस्तक्षेप केला असून, तब्बल १६ इच्छुकांचे पत्ते कट करण्यात आल्याची माहिती खात्रीलायक सूत्रांनी दिली आहे.
काय आहे नेमके प्रकरण? विधान परिषदेच्या रिक्त होणाऱ्या जागांसाठी भाजपकडून मोठ्या संख्येने इच्छुकांनी फिल्डिंग लावली होती. सुरुवातीला राज्य कोअर कमिटीने सुमारे ३० ते ३२ नावांची एक प्राथमिक यादी तयार केली होती. मात्र, सूत्रांनी दिलेल्या माहितीनुसार, दिल्लीतील वरिष्ठ नेत्यांकडून एक स्पष्ट संदेश राज्य शाखेला प्राप्त झाला आहे. ज्या नेत्यांचा जनसंपर्क कमी आहे किंवा ज्यांना पक्ष संघटनेत नवीन जबाबदाऱ्या द्यायच्या आहेत, अशा १६ नावांना या शर्यतीतून बाहेर काढण्यात आले आहे.
कुणाला मिळणार संधी? आता भाजपच्या यादीत केवळ निवडक नावे उरली असून, त्यात प्रामुख्याने जुन्या निष्ठावंतांना आणि संघटनात्मक कामात सक्रिय असलेल्या चेहऱ्यांना प्राधान्य दिले जाण्याची शक्यता आहे. यामध्ये केशव उपाध्ये यांच्या नावावर शिक्कामोर्तब होण्याची दाट शक्यता वर्तवली जात आहे. तसेच, पक्षात नव्याने आलेल्या नेत्यांऐवजी मूळ भाजप कार्यकर्त्यांना संधी द्यावी, असा एक मोठा गट पक्षात सक्रिय आहे.
अंतिम यादीची प्रतीक्षा उमेदवारी अर्ज भरण्याच्या शेवटच्या दिवशी किंवा त्याआधी काही तास भाजप आपली अंतिम यादी जाहीर करणार असल्याचे समजते. महायुतीमधील इतर घटक पक्षांशी (शिवसेना-शिंदे गट आणि राष्ट्रवादी-अजित पवार गट) जागावाटपाची चर्चा आणि अंतर्गत बंडाळी टाळण्यासाठी भाजपने ही ‘वेट अँड वॉच’ची भूमिका घेतली आहे.
या निर्णयामुळे अनेक दिग्गज नेत्यांच्या आशा धुळीस मिळाल्या असून, भाजप आता ‘इलेक्टिव्ह मेरिट’ आणि ‘निष्ठा’ या दोनच गोष्टींवर भर देत असल्याचे स्पष्ट होत आहे.