मध्यपूर्वेतील राजकारण आणि युद्ध आता केवळ जमिनीपुरते मर्यादित राहिले नसून ते थेट आकाशापर्यंत पोहोचले आहे. इराकचे खासदार अब्दुल्ला अल-खैखानी यांनी अमेरिका आणि इस्रायलवर एक अत्यंत खळबळजनक आणि अजब आरोप केला आहे. त्यांच्या मते, अमेरिका आणि इस्रायल मिळून मध्यपूर्वेतील ‘ढग चोरत’ आहेत, ज्यामुळे या भागात गेल्या अनेक वर्षांपासून भीषण दुष्काळ पडला होता.
आरोप नेमका काय आहे? खैखानी यांनी एका मुलाखतीत दावा केला की, अमेरिकन विमाने ‘अॅटमॉस्फेरिक मॉडिफिकेशन वेपन’ (वातावरण बदलणारे शस्त्र) वापरून ढग फोडतात किंवा त्यांची दिशा बदलतात. यामुळे इराक आणि आसपासच्या देशांमध्ये पाऊस पडत नाही. पण आता अमेरिका आणि इस्रायल इराणसोबतच्या युद्धात व्यस्त असल्याने त्यांचे या ‘ढग चोरी’कडे दुर्लक्ष झाले आहे, आणि म्हणूनच या भागात पुन्हा पाऊस पडू लागला आहे, असा दावा त्यांनी केला.
सोशल मीडियावर चर्चा आणि अफवांचे पीक हा दावा समोर येताच सोशल मीडियावर युझर्सनी याला युद्धाशी जोडायला सुरुवात केली आहे. काही लोकांच्या मते, इराणने अमेरिकेच्या तळांवर हल्ले केल्यानंतर अवघ्या पाच दिवसांत तिथे पाऊस पडला, हे या कटाचेच लक्षण आहे. तुर्कस्तानमध्ये होणाऱ्या मुसळधार पावसाचे कारणही काहींनी हेच दिले आहे की, युद्धामुळे अमेरिकन विमाने तिथल्या हवाई हद्दीत जाऊ शकत नाहीत.
तज्ज्ञ काय म्हणतात? हवामान तज्ज्ञांनी मात्र हे सर्व दावे फेटाळून लावले आहेत. इराक हवामान विभागाचे प्रवक्ते अम्र अल-जबीरी यांच्या मते, ढग चोरता येतील असे कोणतेही तंत्रज्ञान जगात अस्तित्वात नाही. ‘क्लाउड सीडिंग’ (कृत्रिम पाऊस) सारखी तंत्रज्ञाने आहेत, पण ती केवळ १५% पर्यंत पाऊस वाढवू शकतात, ढगांची चोरी करू शकत नाहीत.
तज्ज्ञांच्या मते, मध्यपूर्वेतील दुष्काळाचे खरे कारण हे ‘हवामान बदल’ (Climate Change) आहे. या भागात तापमानाचा वाढता वेग जागतिक सरासरीपेक्षा दुप्पट आहे, ज्यामुळे पावसाचे प्रमाण अनियमित झाले आहे. अशा वेळी लोकांच्या मनात असलेली भीती आणि राजकीय अविश्वास यातून अशा ‘कॉन्स्पिरसी थिअरीज’ किंवा कट रचल्याचे दावे जन्माला येतात.