न्यूयॉर्क: सध्या ब्रिटनचे राजे किंग चार्ल्स तृतीय हे अमेरिकेच्या दौऱ्यावर आहेत. या दौऱ्यादरम्यान न्यूयॉर्कमध्ये एक अशी घटना घडली, ज्याची चर्चा आता जगभर होत आहे. न्यूयॉर्कचे महापौर जोहरान ममदानी आणि किंग चार्ल्स यांची भेट झाली, पण या भेटीपूर्वी ममदानी यांनी कोहिनूर हिऱ्याबाबत केलेल्या एका विधानाने सर्वांचे लक्ष वेधून घेतले.
नेमके प्रकरण काय? न्यूयॉर्कमधील लोअर मॅनहॅटन येथे ९/११ च्या दहशतवादी हल्ल्यातील मृतांना श्रद्धांजली वाहण्यासाठी एका कार्यक्रमाचे आयोजन करण्यात आले होते. या कार्यक्रमात किंग चार्ल्स आणि महापौर जोहरान ममदानी एकत्र येणार होते. या भेटीपूर्वी झालेल्या एका पत्रकार परिषदेत पत्रकारांनी ममदानी यांना विचारले की, “जर तुम्ही किंग चार्ल्सना भेटलात, तर त्यांना काय सांगाल?”
यावर भारतीय वंशाचे असलेले ममदानी यांनी अतिशय स्पष्टपणे उत्तर दिले. ते म्हणाले, “जर मला किंग चार्ल्स यांच्याशी वैयक्तिकरित्या बोलण्याची संधी मिळाली, तर मी त्यांना ‘कोहिनूर’ हिरा भारताला परत करण्यासाठी नक्कीच प्रोत्साहित करेन.”
कोहिनूरचा वाद पुन्हा चर्चेत कोहिनूर हिरा हा जगातील सर्वात मौल्यवान आणि ऐतिहासिक हिऱ्यांपैकी एक आहे. ब्रिटीश राजवटीत हा हिरा भारतातून नेण्यात आला होता आणि सध्या तो ब्रिटीश राजघराण्याच्या मुकुटाची शोभा वाढवत आहे. भारताने अनेकदा हा हिरा परत करण्याची मागणी केली आहे. ममदानी यांच्या या विधानामुळे हा जुना वाद पुन्हा एकदा जागतिक स्तरावर चर्चेत आला आहे.
श्रद्धांजली वाहिली जात असताना ममदानी यांनी किंग चार्ल्स यांची भेट घेतली आणि हस्तांदोलनही केले. मात्र, सार्वजनिक कार्यक्रमात त्यांनी कोहिनूरचा विषय काढला नाही. पण त्यांच्या विधानाने सोशल मीडियावर मात्र मोठी खळबळ उडवून दिली आहे. काहींनी त्यांच्या धाडसाचे कौतुक केले आहे, तर काहींनी याला राजनैतिक शिष्टाचाराच्या विरुद्ध म्हटले आहे.