मुंबई: महाराष्ट्राच्या आणि विशेषतः ठाण्याच्या राजकारणात आज एक अत्यंत महत्त्वाची आणि अनपेक्षित घडामोड पाहायला मिळाली. ठाण्यातील मातब्बर आणि प्रतिष्ठित डावखरे कुटुंबात आता उघड राजकीय फूट पडली आहे. भाजपचे विद्यमान आमदार निरंजन डावखरे यांचे मोठे बंधू आणि प्रसिद्ध तरुण व्यावसायिक प्रबोध डावखरे यांनी आज अधिकृतपणे राष्ट्रवादी काँग्रेस पक्षात (NCP) प्रवेश केला आहे. मुंबईत पार पडलेल्या एका विशेष सोहळ्यात प्रबोध डावखरे यांनी राष्ट्रवादीचे घड्याळ हातावर बांधले. एकाच घरातील दोन भाऊ आता वेगवेगळ्या राजकीय पक्षांत सक्रिय झाल्यामुळे ठाण्याच्या राजकीय वर्तुळात प्रचंड चर्चा रंगली आहे.
ज्येष्ठ नेत्यांच्या उपस्थितीत भव्य पक्षप्रवेश प्रबोध डावखरे यांच्या या पक्षप्रवेशासाठी राष्ट्रवादी काँग्रेसचे दिग्गज नेते उपस्थित होते. पक्षाचे ज्येष्ठ नेते आणि मंत्री छगन भुजबळ, सुनील तटकरे आणि माजी मंत्री दिलीप वळसे पाटील यांच्या प्रमुख उपस्थितीत हा सोहळा पार पडला. मान्यवरांनी प्रबोध डावखरे यांचे पक्षात उत्साहात स्वागत केले आणि त्यांच्या येण्याने ठाणे जिल्ह्यात पक्षाला मोठी ताकद मिळेल, असा विश्वास व्यक्त केला.
‘माझ्या वडिलांची इच्छा मी पूर्ण केली’ – भावूक प्रबोध डावखरे पक्षप्रवेशानंतर बोलताना प्रबोध डावखरे अत्यंत भावूक झाले होते. त्यांनी आपले दिवंगत वडील आणि विधान परिषदेचे माजी उपसभापती वसंत डावखरे यांच्या आठवणींना उजाळा दिला. प्रबोध म्हणाले, “आजचा दिवस माझ्या आयुष्यातील अत्यंत महत्त्वाचा दिवस आहे. माझे वडील वसंत डावखरे यांनी आयुष्यभर ज्या पक्षासाठी अपार कष्ट केले, आज त्याच पक्षात मी प्रवेश करत आहे. जेव्हा ते रुग्णालयात उपचार घेत होते, तेव्हा त्यांनी मला एक कानमंत्र दिला होता. ते म्हणाले होते की, भविष्यात कधीही राजकारणात जाण्याचा विचार केलास, तर फक्त राष्ट्रवादी काँग्रेस पक्षातच जा. वडिलांचा तोच शब्द आणि इच्छा लक्षात ठेवून आज मी हा निर्णय घेतला आहे. वडिलांनी ठाण्यात राष्ट्रवादीचे संघटन मजबूत केले होते, आता त्यांचा हाच वारसा मी पुढे घेऊन जाईन.”
नेतृत्वाकडून कौतुक आणि मोठी जबाबदारी मिळण्याचे संकेत प्रबोध डावखरे यांच्या प्रवेशावर बोलताना छगन भुजबळ म्हणाले, “दिवंगत वसंत डावखरे हे महाराष्ट्राच्या राजकारणातील ‘अजातशत्रू’ नेते होते. त्यांचा कोणाशीही आकस किंवा वैर नव्हते. आज त्यांचे चिरंजीव प्रबोध आपल्या पक्षात आले आहेत. प्रबोध हे केवळ राजकारणी नसून एक यशस्वी व्यावसायिक आहेत. त्यांच्या महाराष्ट्रात सुमारे ३० जिम आहेत. अशा कर्तृत्ववान तरुणाला पक्षात योग्य सन्मान आणि वागणूक दिली जाईल. ते पक्षाचे काम मजबुतीने करतील यात शंका नाही.”
दिलीप वळसे पाटील यांनीही प्रबोध यांचे स्वागत करत म्हटले की, पक्षाच्या राष्ट्रीय अध्यक्षा सुनेत्रा पवार यांच्या वतीने आम्ही त्यांचे स्वागत करतो. वसंत डावखरे यांचा ठाणे जिल्ह्यात मोठा मानणारा वर्ग आहे, प्रबोध यांच्या माध्यमातून हा वर्ग पुन्हा पक्षाशी जोडला जाईल आणि ठाण्यात राष्ट्रवादी काँग्रेसचे संघटन अधिक मजबूत होईल.
डावखरे कुटुंबातील राजकीय संघर्ष वाढणार? २०१८ मध्ये निरंजन डावखरे यांनी राष्ट्रवादी काँग्रेसला रामराम ठोकून भाजपमध्ये प्रवेश केला होता. सध्या ते ठाणे भाजपचे जिल्हाध्यक्ष आणि कोकण पदवीधर मतदारसंघाचे आमदार आहेत. आता त्यांचे मोठे बंधू प्रबोध डावखरे थेट विरोधी विचारसरणीच्या राष्ट्रवादी काँग्रेस पक्षात गेल्यामुळे एकाच घरात आता भाजप विरुद्ध राष्ट्रवादी असा सामना पाहायला मिळणार आहे. आगामी निवडणुकांच्या पार्श्वभूमीवर ठाण्यातील हा कौटुंबिक आणि राजकीय संघर्ष काय वळण घेतो, याकडे सर्वांचे लक्ष लागले आहे.