ग्लॅमरच्या जगात अनेकदा केवळ बाह्य सौंदर्याला महत्त्व दिले जाते. छोट्याशा त्रुटी किंवा डागही मेकअपच्या थराखाली लपवले जातात. पण अभिनेत्री राजश्री देशपांडेने या परंपरेला छेद देत एका नव्या धैर्याची ओळख करून दिली आहे. काही महिन्यांपूर्वी ‘ब्रेस्ट कॅन्सर’ (स्तनाचा कर्करोग) सारख्या जीवघेण्या आजाराचे निदान झाल्यानंतर राजश्रीने केवळ त्याशी लढाच दिला नाही, तर शस्त्रक्रियेनंतर शरीरावर उमटलेल्या खुणांना अभिमानाने जगासमोर आणले आहे.
धक्कादायक निदान आणि अश्रूंचा प्रवास राजश्रीने सोशल मीडियावर एका भावूक पोस्टद्वारे आपल्या प्रवासाचा उलगडा केला. मार्च महिन्यात नियमित तपासणी (Routine Checkup) दरम्यान तिला ‘ग्रेड १ ब्रेस्ट कॅन्सर’ (Infiltrating Ductal Carcinoma) असल्याचे निदान झाले. ‘कॅन्सर’ हा शब्द ऐकताच कोणाच्याही पायाखालची जमीन सरकते, राजश्रीच्या बाबतीतही तेच झाले. ती म्हणाली, “हा प्रवास मुळीच सोपा नव्हता. निदान झाल्याचे कळताच मी ढसाढसा रडले, मानसिकदृष्ट्या पूर्ण खचून गेले होते.” पण आई-वडिलांच्या पाठिंब्यामुळे आणि स्वतःच्या जिद्दीमुळे तिने या संकटाचा सामना करण्याचे ठरवले.
खुणा नाही, तर विजयाची चिन्हे! शस्त्रक्रिया यशस्वी झाल्यानंतर राजश्रीने नुकतेच साडीमध्ये एक सुंदर फोटोशूट केले आहे. या फोटोंमध्ये तिने आपल्या शस्त्रक्रियेचे व्रण (Scars) लपवण्याचा कोणताही प्रयत्न केला नाही. उलट, अतिशय आत्मविश्वासाने त्या खुणा फ्लॉन्ट केल्या आहेत. यावर तिने एक अतिशय सुंदर कॅप्शनही दिले आहे – “या खुणा माझ्या जगण्याची कहाणी सांगतात. प्रत्येक खुण ही एक आठवण आहे की मी लढले, मी जगले आणि मी जिंकले!” राजश्रीच्या मते, हे डाग नसून तिच्या धैर्याचे मुकूट आहेत.
लाखो महिलांसाठी प्रेरणा आजही समाजात कॅन्सरबद्दल बोलताना अनेक महिला कचरतात. विशेषतः शस्त्रक्रियेनंतर येणाऱ्या शारीरिक बदलांमुळे अनेकजणी न्यूनगंड बाळगतात. अशा वेळी राजश्रीचे हे पाऊल केवळ तिच्या चाहत्यांनाच नाही, तर या आजाराशी झुंज देणाऱ्या प्रत्येक महिलेला नवी उमेद देणारे ठरले आहे. सोशल मीडियावर तिच्या या धाडसाचे मोठे कौतुक होत असून, “खरी सुंदरता ही मनातल्या धैर्यात असते,” अशा कमेंट्स नेटकरी करत आहेत.