अयोध्या: बॉलीवूडचा ‘चॉकलेट बॉय’ आणि सध्याचा अत्यंत चर्चेत असलेला अभिनेता रणबीर कपूर सध्या त्याच्या आगामी ‘रामायण’ चित्रपटामुळे चर्चेत आहे. या चित्रपटात तो प्रभू श्रीरामाची भूमिका साकारत असतानाच, आता त्याने खऱ्या आयुष्यातही रामनगरीशी एक अतूट नाते जोडले आहे. रणबीर कपूरने अयोध्येमध्ये तब्बल ३.३१ कोटी रुपयांचा एक आलिशान भूखंड (Plot) खरेदी केला आहे.
कुठे आहे हा भूखंड?
रणबीरने ही गुंतवणूक ‘द हाऊस ऑफ अभिनंदन लोढा’ (HoABL) यांच्या ‘द सरयू’ या प्रीमियम प्रोजेक्टमध्ये केली आहे. हा प्रकल्प शरयू नदीच्या काठावर ७५ एकर परिसरात पसरलेला आहे. रणबीरने खरेदी केलेला हा भूखंड २,१३४ स्क्वेअर फूटचा असून, हे ठिकाण अयोध्येतील अत्यंत पॉश आणि आध्यात्मिकदृष्ट्या महत्त्वाचे मानले जात आहे. या ठिकाणी पंचतारांकित हॉटेल ‘द लीला’, भव्य क्लबहाऊस आणि ३५ पेक्षा जास्त आधुनिक सुविधा असणार आहेत.
रणबीर कपूरची भावूक प्रतिक्रिया
या गुंतवणुकीनंतर आपली भावना व्यक्त करताना रणबीर म्हणाला, “मला असं वाटतं की अयोध्येनेच माझी निवड केली आहे आणि मी फक्त त्या सादेला प्रतिसाद दिला आहे. अयोध्या आपल्या इतिहासाचा आणि संस्कृतीचा अविभाज्य भाग आहे. ‘द सरयू’ मधील ही जमीन माझ्या कुटुंबासाठी एका मोठ्या वारशाची सुरुवात आहे.” विशेष म्हणजे, ही संपूर्ण व्यवहार प्रक्रिया डिजिटल पद्धतीने पार पडली असून ती अत्यंत पारदर्शक असल्याचेही त्याने नमूद केले.
अयोध्येत सेलिब्रिटींची मांदियाळी
अयोध्येत राम मंदिर निर्माणानंतर जमिनींच्या किमतीत मोठी वाढ झाली आहे. रणबीर कपूरच्या आधी महानायक अमिताभ बच्चन यांनीही याच ‘द सरयू’ प्रोजेक्टमध्ये मोठी गुंतवणूक केली आहे. अयोध्येचा कायापालट होत असताना आता बॉलीवूडचे दिग्गज कलाकार तिथे आपले हक्काचे घर किंवा गुंतवणूक करण्याला पसंती देत आहेत.
रणबीरचा ‘रामायण’ चित्रपट लवकरच प्रेक्षकांच्या भेटीला येणार असून, त्यापूर्वी त्याने अयोध्येत घेतलेली ही जमीन त्याच्या चाहत्यांसाठी एक आनंदाची बातमी ठरत आहे.