मुंबई: ‘बिग बॉस मराठी’च्या सहाव्या सीझनमध्ये आपल्या साध्या आणि सुसंस्कृत वागण्याने प्रेक्षकांची मने जिंकणारा अभिनेता म्हणजे राकेश बापट. ‘तुम बिन’ या बॉलिवूड चित्रपटातून करिअरची दमदार सुरुवात करणाऱ्या राकेशने या रिअॅलिटी शोमध्ये ‘जेंटलमन’ म्हणून ओळख मिळवली. मात्र, राकेश जेव्हा बिग बॉसच्या घरात खेळाचा आनंद घेत होता, तेव्हा घराबाहेर मात्र त्याच्या लग्नाच्या अफवांनी चांगलाच जोर धरला होता.
राकेश बापट आणि मराठी चित्रपटसृष्टीची लाडकी अभिनेत्री तेजश्री प्रधान यांचे लग्न जमले असून ते लवकरच विवाहबंधनात अडकणार आहेत, अशा चर्चांनी सोशल मीडियावर धुमाकूळ घातला होता. विशेष म्हणजे, राकेशला या गोष्टीची पुसटशी कल्पनाही नव्हती. नुकत्याच एका मुलाखतीत राकेश आणि त्याची बहीण शीतल यांनी या अफवेमागचं सत्य उघड केलं आहे.
नेमकं काय घडलं होतं? ‘राजश्री मराठी’ला दिलेल्या मुलाखतीत शीतल यांनी सांगितलं की, “राकेश बिग बॉसच्या घरात असताना मला सोशल मीडियावर एक रील पाहायला मिळालं. त्यामध्ये चक्क राकेश आणि तेजश्री प्रधान मे महिन्यात लग्न करणार असल्याचा दावा करण्यात आला होता. इतकंच नाही, तर त्या रीलमध्ये लग्नाची तारीखही देण्यात आली होती.”
ही बातमी वाऱ्यासारखी पसरली आणि राकेशच्या घरच्यांनाही त्याचा मनस्ताप सहन करावा लागला. शीतल पुढे म्हणाल्या, “माझ्या मैत्रिणी मला फोन करून विचारायला लागल्या की, ‘आता ही नवीन सून कोण?’ इतकंच काय, तर काही जवळच्या नातेवाईकांनी तर आईलाही फोन केले आणि या बातमीबद्दल चौकशी केली. मुळात राकेश आणि तेजश्रीचा असा काहीच संबंध नाहीये.”
राकेशची प्रतिक्रिया: जेव्हा राकेश बिग बॉसच्या घरातून बाहेर आला, तेव्हा त्याला बहिणीने ही बातमी दाखवली. ही अफवा ऐकून राकेशलाही मोठा धक्का बसला. तो म्हणाला, “मी आतमध्ये गेम खेळत होतो आणि बाहेर लोकांनी माझं लग्नही लावून दिलं! बातमी पाहिल्यावर मला हसावं की रडावं हेच कळेना, कारण यात काहीच तथ्य नव्हतं.”
राकेश बापट आणि रिद्धी डोगरा यांच्या घटस्फोटानंतर राकेशच्या वैयक्तिक आयुष्याबद्दल नेहमीच चाहत्यांमध्ये कुतूहल असतं, पण तेजश्री प्रधानसोबतच्या या अफवेने सर्वांच्याच भुवया उंचावल्या होत्या. सध्या या खुलाशानंतर या चर्चांना पूर्णविराम मिळाला आहे.