मुंबई: महाराष्ट्र राजकारणात सध्या पडद्यामागे वेगाने चक्रं फिरत आहेत. दोन्ही ‘राष्ट्रवादी’ काँग्रेस पक्षांतर्गत मोठ्या घडामोडी घडत असतानाच, राष्ट्रवादी काँग्रेस शरदचंद्र पवार पक्षाचे तरुण आमदार रोहित पवार हे त्यांचे आजोबा आणि पक्षाचे सर्वेसर्वा शरद पवार यांच्यावर नाराज असल्याची जोरदार चर्चा राजकीय वर्तुळात रंगली होती. शरद पवारांनी नुकतीच प्रतिस्पर्धी गटातील प्रफुल पटेल आणि सुनील तटकरे यांची केलेली प्रशंसा रोहित पवारांना खटकली, म्हणूनच त्यांनी पक्षाच्या अत्यंत महत्त्वाच्या बैठकीकडे पाठ फिरवली, असे तर्कवितर्क लावले जात होते. मात्र, आता या सर्व चर्चांना आणि अफवांना स्वतः रोहित पवारांनी पूर्णविराम दिला असून आपली बाजू स्पष्ट केली आहे.
काय म्हणाले रोहित पवार? मुंबईतील यशवंतराव चव्हाण सभागृहात शरद पवार यांच्या उपस्थितीत पक्षाची एक अत्यंत महत्त्वाची बैठक आयोजित करण्यात आली होती. या बैठकीला रोहित पवार उपस्थित राहणार नसल्याचे स्पष्ट होताच सोशल मीडिया आणि राजकीय वर्तुळात उलटसुलट चर्चा सुरू झाल्या. यावर स्पष्टीकरण देताना रोहित पवार म्हणाले, “मी नाराज असल्याच्या ज्या बातम्या काही वृत्तवाहिन्यांवर दाखवल्या जात आहेत, त्या पूर्णपणे निराधार आणि चुकीच्या आहेत. आम्ही कालही आदरणीय पवार साहेबांच्या मार्गदर्शनाखाली काम करणारे कार्यकर्ते होतो आणि आजही आहोत. आमच्यात कोणतीही नाराजी नाही.”
बैठकीला दांडी मारण्यामागचं ‘हे’ होतं खरं कारण! मुंबईतील बैठकीत उपस्थित न राहता रोहित पवार थेट पुण्याच्या सिंचन भवनात पोहोचले होते. त्यामागचं कारण सांगताना त्यांनी शेतकऱ्यांचा प्रश्न पुढे केला. रोहित पवार म्हणाले, “माझ्या मतदारसंघातील कुकडी आणि बारामतीमधील शेतकऱ्यांसाठी ‘जनाई-शिरसाई’ उपसा सिंचन योजनेच्या पाण्याचा प्रश्न अत्यंत गंभीर आणि महत्त्वाचा आहे. हा प्रश्न सोडवण्यासाठी मला अचानक पुण्यात सिंचन भवनात यावे लागले. जर प्रशासनावर योग्य दबाव असता आणि त्यांनी वेळेवर पाणी सोडण्याचा आपला शब्द पाळला असता, तर आज मला पुण्यात येण्याची गरज पडली नसती. मी मुंबईतील पूर्वपरवानगी घेतलेल्या पक्षाच्या बैठकीला नक्कीच उपस्थित राहू शकलो असतो.”
पक्षाकडून ठोस भूमिकेची अपेक्षा शेतकऱ्यांच्या मुद्द्यावर अधिक बोलताना रोहित पवार यांनी पक्षाच्या ज्येष्ठ नेत्यांकडे एक जाहीर अपेक्षाही व्यक्त केली. “आज राज्यातील बळीराजा आणि सामान्य माणूस प्रचंड अडचणीत सापडला आहे. अशा परिस्थितीत त्यांच्या हक्कासाठी, त्यांच्या पाण्यासाठी आपल्याला अधिक आक्रमकपणे रस्त्यावर उतरून संघर्ष करण्याची गरज आहे. पक्ष आणि आमचे वरिष्ठ नेते यावर आजच्या बैठकीत नक्कीच योग्य आणि ठोस निर्णय घेतील, असा मला पूर्ण विश्वास आहे,” असे मत त्यांनी व्यक्त केले.
एकीकडे सुनित्रा पवार यांच्या राष्ट्रवादी गोटात प्रफुल पटेल आणि सुनील तटकरे नाराज असल्याच्या चर्चा आणि दुसरीकडे शरद पवार यांच्या गटात विलीनीकरणाच्या मुद्द्यावर खलबतं सुरू असताना, रोहित पवारांनी घेतलेल्या या भूमिकेने त्यांच्या मतदारसंघातील शेतकऱ्यांना दिलासा मिळाला असला, तरी राजकीय निरीक्षकांच्या नजरा मात्र या घडामोडींवर खिळल्या आहेत.