बॉलिवूडचा ‘बादशाह’ शाहरुख खान पुन्हा एकदा मोठ्या पडद्यावर धुमाकूळ घालण्यासाठी सज्ज झाला आहे. सध्या सोशल मीडियावर एकाच गोष्टीची चर्चा आहे, ती म्हणजे शाहरुखचा आगामी चित्रपट ‘किंग’. विशेष म्हणजे या चित्रपटाचे चित्रीकरण सध्या दक्षिण आफ्रिकेतील केपटाऊनमध्ये सुरू असून, तिथल्या सेटवरील काही फोटो आणि व्हिडिओ लीक झाले आहेत. यामध्ये शाहरुख खान आणि ग्लॅमरस दीपिका पदुकोण यांची जोडी पुन्हा एकदा एकत्र दिसत असल्याने चाहत्यांची उत्सुकता शिगेला पोहोचली आहे.
कसा आहे शाहरुखचा लूक? लीक झालेल्या व्हिडिओमध्ये शाहरुख खान अतिशय स्टायलिश अवतारात दिसत आहे. त्याने निळ्या रंगाचा लायनिंग असलेला शर्ट घातला असून डोळ्यांवर कूल गॉगल लावला आहे. त्याचा हा ‘रफ अँड टफ’ लूक चाहत्यांना ‘पठाण’ आणि ‘जवान’ची आठवण करून देत आहे. महत्त्वाचे म्हणजे, या व्हिडिओमध्ये शाहरुखने दीपिका पदुकोणचा हात धरलेला दिसत आहे, ज्यामुळे या चित्रपटात दीपिकाची विशेष भूमिका किंवा कॅमिओ असणार असल्याचे स्पष्ट होत आहे.
सुहाना खानचीही लागणार वर्णी? ‘किंग’ चित्रपट शाहरुखसाठी खास असण्याचे अजून एक कारण म्हणजे त्याची लाडकी लेक सुहाना खान. चर्चा अशी आहे की, या चित्रपटातून सुहाना खान मोठ्या पडद्यावर पदार्पण करणार आहे. बाप-लेकीची ही जोडी पडद्यावर पाहणे चाहत्यांसाठी मोठी पर्वणी ठरेल.
ख्रिसमसला मिळणार चाहत्यांना गिफ्ट! शाहरुखचा शेवटचा चित्रपट ‘डंकी’ बॉक्स ऑफिसवर फारशी कमाल दाखवू शकला नव्हता. त्यामुळे आता ‘किंग’च्या माध्यमातून शाहरुख पुन्हा एकदा अॅक्शन मोडमध्ये परतत आहे. हा चित्रपट या वर्षाच्या अखेरीस म्हणजेच ख्रिसमसच्या मुहूर्तावर प्रदर्शित होण्याची शक्यता आहे. अॅक्शन, ड्रामा आणि शाहरुखची जादू यांनी भरलेला हा चित्रपट बॉक्स ऑफिसचे सर्व रेकॉर्ड मोडणार का? हे पाहणे औत्सुक्याचे ठरेल.