जयपूर: भारताच्या लष्करी इतिहासातील एक ऐतिहासिक पाऊल मानल्या गेलेल्या ‘ऑपरेशन सिंदूर’ला आज एक वर्ष पूर्ण झाले आहे. या निमित्ताने गुलाबी शहर जयपूरमध्ये शौर्याचा उत्साह पाहायला मिळत असून, देशाचे संरक्षण मंत्री राजनाथ सिंह यांच्यासह तिन्ही सेनादलांचे प्रमुख एकत्र आले आहेत. साउथ वेस्टर्न कमांडमध्ये आयोजित एका विशेष कार्यक्रमात लष्करी अधिकाऱ्यांनी देशाच्या सुरक्षेबाबत मोठी विधाने केली आहेत.
“ही तर फक्त सुरुवात आहे…” लष्करी ऑपरेशन्सचे महासंचालक लेफ्टनंट जनरल राजीव घई यांनी स्पष्ट शब्दांत ठणकावून सांगितले की, “ऑपरेशन सिंदूर अजून संपलेले नाही, ही तर केवळ सुरुवात आहे.” दुष्यंत कुमार यांच्या गाजलेल्या काव्यपंक्तींचा – ‘सिर्फ हंगामा करना मेरा मकसद नहीं, मेरी कोशिश है कि ये सूरत बदलनी चाहिए’ – आधार घेत त्यांनी भारताचा दहशतवादाविरुद्धचा संकल्प व्यक्त केला. ते म्हणाले की, भारत आपल्या सुरक्षेसाठी कोणतीही तडजोड करणार नाही आणि प्रत्येक आव्हानाला चोख प्रत्युत्तर दिले जाईल.
स्वदेशी शस्त्रांची ताकद भारतीय लष्कर आता आत्मनिर्भरतेच्या दिशेने वेगाने पाऊल टाकत असल्याचे यावेळी सांगण्यात आले. घई यांनी माहिती दिली की, सध्या लष्कर वापरत असलेल्या शस्त्रास्त्रांपैकी ६५% शस्त्रे ही भारतात तयार झालेली आहेत. स्वदेशी बनावटीच्या या शस्त्रांमुळेच आपल्या सीमा अधिक सुरक्षित झाल्या आहेत.
पहलगाम हल्ल्याचा सूड आणि पूर्ण स्वातंत्र्य एअर मार्शल अवधेश कुमार भारती यांनी या मोहिमेच्या पार्श्वभूमीवर भावनिक आणि तितकाच कठोर संदेश दिला. ते म्हणाले, “पहलगाम हल्ल्यात आम्ही आमचे जे बांधव गमावले, त्यांना आम्ही परत आणू शकत नाही, पण पुन्हा असा हल्ला करण्याची हिम्मत कोणाची होणार नाही, याची खात्री आम्ही नक्कीच देऊ शकतो.”
ऑपरेशन सिंदूरच्या वेळी लष्कराला पूर्ण ‘ऑपरेशनल फ्रीडम’ म्हणजेच कारवाईचे पूर्ण स्वातंत्र्य देण्यात आले होते. ७ मे २०२५ च्या पहाटे जेव्हा भारतीय जवानांनी पाकव्याप्त काश्मीर (PoK) आणि पाकिस्तानमधील दहशतवादी तळांवर प्रहार केला, तेव्हा तो संदेश केवळ शत्रूसाठी नव्हता, तर संपूर्ण जगासाठी भारताच्या वाढत्या शक्तीचे प्रदर्शन होते.
विशेष चित्रपटाचे प्रदर्शन या खास प्रसंगी ‘ऑपरेशन सिंदूर’च्या थरारावर आधारित एका लघुपटाचे प्रदर्शन सायंकाळी ५ वाजता केले जाणार आहे. या कार्यक्रमाला संरक्षण मंत्री राजनाथ सिंह स्वतः उपस्थित राहून जवानांच्या शौर्याचे कौतुक करतील.