पुणे/मुंबई: ‘इंडियन आयडल’च्या पहिल्या सीझनपासून घराघरात पोहोचलेली गायिका प्राजक्ता शुक्रे सध्या पुन्हा एकदा चर्चेत आली आहे. निमित्त आहे ते म्हणजे तिचं आणि लोकप्रिय गायक राहुल वैद्य यांच्यातील जुन्या नात्याच्या चर्चा. गेल्या अनेक वर्षांपासून ‘राहुल आणि प्राजक्ता एकमेकांना डेट करत होते’ अशा अफवा सोशल मीडियावर आणि इंडस्ट्रीत फिरत होत्या. मात्र, आता स्वतः प्राजक्ताने एका मुलाखतीत या सगळ्यावर स्पष्ट भाष्य करत पडदा उचलला आहे.
काय म्हणाली प्राजक्ता? सिद्धार्थ कन्ननला दिलेल्या मुलाखतीत प्राजक्ताला राहुल वैद्यबद्दल विचारण्यात आले. त्यावर तिने अत्यंत प्रांजळपणे उत्तर दिले. प्राजक्ता म्हणाली, “तो मला खूप आवडायचा आणि त्या वयात ते साहजिक होतं. आम्ही तेव्हा खूप लहान होतो आणि खरं सांगायचं तर आम्हा दोघांनाही जगाची फारशी अक्कल नव्हती. आम्ही काहीच ठरवलं नव्हतं.”
जेव्हा राहुलने तिला प्रपोज केलं होतं का, असं विचारलं गेलं, तेव्हा तिने हसत हसत उत्तर दिलं की, “मी यावर जास्त काही बोलणार नाही, पण राहुलने मला एकदा म्हटलं होतं की ‘तू खूप चांगली आहेस आणि मला तू खूप आवडतेस.’ त्यावर मी सुद्धा त्याला म्हटलं होतं की, ‘तू सुद्धा माणूस म्हणून खूप छान आहेस आणि तुझा आवाज तर अप्रतिम आहेच.'”
का दुरावली ही जोडी? प्राजक्ताने त्यांच्यातील दुराव्याचं कारणही सांगितलं. ती म्हणाली की, त्यांच्या कामाच्या पद्धती बदलल्या होत्या. राहुल वेडिंग शो (लग्नातील कार्यक्रम) मध्ये व्यस्त असायचा, तर प्राजक्ताला अशा कार्यक्रमांमध्ये गाणं फारसं आवडत नसे. एकदा अशाच एका शोमध्ये गेल्यावर लोकांचे गाण्याकडे दुर्लक्ष पाहून तिच्या बालमनावर परिणाम झाला होता. हळूहळू दोघांच्या विचारांमधील फरक जाणवू लागला आणि कोणतेही भांडण न होता ते एकमेकांपासून लांब गेले.
आज राहुल वैद्य आपल्या संसारात सुखी आहे, तर प्राजक्ता आपल्या गायकीच्या जोरावर प्रेक्षकांची मनं जिंकत आहे. मात्र, त्यांच्या या जुन्या ‘फ्रेंडशिप’ची चर्चा आता पुन्हा एकदा चाहत्यांमध्ये रंगली आहे.